بەڕێوبەری جێبەجێکاری یانەی بوروسیا دۆرتمۆند، هانز یواکیم ڤاتسکە لەبارەی گواستنەوەکانی هاوینەی 2021 و فرۆشتنی هالاند و سانچۆوە بۆچونێکی پێچەوانە نیشاندەدات.
هانز یواکیم ڤاتسکە، بەڕێوبەری جێبەجێکاری بوروسیا دۆرتمۆند بە سکای سپۆرتی ڕاگەیاندووە، ” پێموانییە لە گواستنەوەکانی هاوینەی 2021 بۆندی گرانبەهامان پێبگات، لەبەرئەوەی قەیرانی کۆرۆنا کاریگەری لەسەر هەموو یانەکان دروستکردووە، ئێمە دەزانین بارودۆخی تۆپی پێی ئەوروپا لە چ ئاستێکدایە”.
هەروەها دەڵێت، ” هاوینی داهاتوو، هاوینی واژوونەکردنی بۆندە گەورەکان دەبێت”.
لێدوانەکانی ڤاتسکە هاوکاتە لەگەڵ ئەو زانیاریانەی لەلایەن میدیاکانی بەریتانیا و ئیسپانیاوە دەربارەی جادۆن سانچۆ و ئێرلینگ هالاند بڵاودەکرێنەوە.
بەپێی سەرچاوەکان، هالاند نزیکە لە پەیوەندیکردن بە یەکێک لە یانەکانی ڕیاڵ مەدرید و بەرشلۆنە، جادۆن سانچۆی بەریتانیش نزیکبوو لە پەیوەندیکردن بە مانچستەر یونایتد، بەڵام بەهۆی پێداگری ئیدارەی یانە زەردەکەوە دانوستاندنەکان شکستیانهێنا.
