سویسرا.. ڕاپرسییەك قەدەغەكردنی پەچە یەكلایی دەكاتەوە

ئەمڕۆ یەكشەممە 7ی ئازار، ڕاپرسییەك لە سویسرا دەكرێت لەبارەی قەدەغەكردنی پەچە و نیقاب لە شوێنە گشتییەكاندا.

ڕاپرسییەكە گشتییە و لە مانگی كانونی دووەمی ئەمساڵەوە حكومەت داوای كردووە و ئامادەكاری بۆكراوە.

ئامانج لەو ڕاپرسییەی سویسراییەكان، قەدەغەكردنی پۆشینی پەچە و نیقابە لە چێشتخانە و شوێنە گشتییەكاندا، بەجۆرێك كە تەنها لەناو پەرستگەكاندا نیقاب و پەچە بپۆشرێن، یاخود لەبەر هۆكاری تەندروستی یان بۆ پەیڕەوكردنی “نەریتی ناوخۆیی”.

ژمارەی دانیشتووانی سویسرا 8.6 ملیۆن كەسە و ڕێژەی مسوڵمانان لەسەدا پێنجە. وۆڵتەر وبمان، ئەندامی پارتی گەلی سویسرا لە پەرلەمان و سەرۆكی لیژنەی ڕاپرسییەكە دەڵێت، “نەریتی ئێمەی سویسرایی نییە ڕووخسارمان دابپۆشین، ئەمەش نیشانەی ئازادییە بنەڕەتییەكانمانە.”

بەگوێرەی ڕاپرسییە بەراییەكان كە بەر لە ڕاپرسییە گشتییەكەی ئەمڕۆ كراون، زۆرینەی سویسراییەكان پشتیوانی لە قەدەغەكردنی پەچە و نیقاب دەكەن بەجۆرێك بكرێت بە یاسا. بەڵام حكومەتی سویسرا پرسی پەچە بە دیاردەیەكی لاوەكی ئەژماردەكات و پێی وایە قەدەغەكردنی زیان بە كەرتی گەشتوگوزاری سویسرا دەگەیەنێت.

بابەتی پێشتر

پاپا فرانسیس لە هەرێمی کوردستانە

بابەتی دواتر

ئەمڕۆ هەڵمەتی کوتان بە ڤاکسینی کۆرۆنا لە سلێمانی دەستپێدەکات

بابەتی پەیوەندیدار
Total
1
Share