بڵاوبوونەوەی نەخشەی ئەو شوێنانەی ئەفغانستان كە لەژێر كۆنترۆڵی حکومەتی وڵاتەكە و بزوتنەوەی تاڵیبانەوەن، هێندەی دیکە حکومەتی ئەو وڵاتەی بەرامبەر تاڵیبان لاواز نیشاندا.
بەپێی نەخشەیەک، کە ئاژانسی ئەسۆشیەیتد پرێس لەبارەی دۆخی سەربازیی ئێستای ئەفغانستان بڵاویکردووەتەوە، دەردەکەوێت، حکومەت لەلایەن چەکدارانی تاڵیبانەوە تەوقدراوە و بە نزیکی چەند ویلایەتێکی لەژێر کۆنترۆڵدایە.
چەکدارانی تاڵیبان ویلایەتەکانی “كەندوز” و “فەرەح”ی بە تەواوی بەدەستەوەیە، چەند ویلایەتێکی دیکەش وەک “هێلمەند” و “قەندەهار” نزیکە بکەونە دەستی تاڵیبان.
بەهۆی کشانەوەی هێزەکانی ئەمریکا و ناتۆ لە ئەفغانستان، حکومەتی ئەو وڵاتە بەرامبەر تاڵیبان لاواز دەردەکەوێت و ئەگەری هەیە لەئەگەری قوڵتربوونەوەی شەڕدا، حکومەت و سوپای وڵاتەكە خۆی بەرامبەر تاڵیبان ڕانەگرێت، بەتایبەت دوای ئەوەی بەشێک لە سوپای ئەفغان بەرەو وڵاتانی دراوسێ هەڵاتوون.
حکومەتی تاجکستانی دراوسێ ڕایگەیاندووە هەزار و 37 ئەندامی سوپای ئەفغانستان بەرەو ئەو وڵاتە هەڵاتوون و ئەوانیش زیاتر لە 20 هەزار سەربازیان لە سنورەکان جێگیرکردووە.
