بەپرسێکی ئەمریکی ڕایگەیاند بەیانی ئەمرۆ 26 ی شوبات فڕۆکە جەنگییەکانی ئەمریکا پێگەیەکی چەکدارانی نزیک لە ئێرانیان لە نێوان سوریا و عێراقدا بۆردومان کردووە و 17 ئەندامی چەکدارەکان کوژراوە.
ئاژانسی هەواڵی ڕۆیتەرز، لە زاری ئەو بەرپرسە ئەمریکییەوە ئاشکرایکردووە، “لە کاتی هێرشەکەدا جۆبایدن، سەرۆکی ویلایەتەیەکگرتووەکانی ئەمریکا ئاگادارکراوەتەوە و پاشان پێگەی گروپە چەکدارییەکان کراوەتە ئامانج”.
بەپێی زانیارییەکانی ڕێکخراوی ڕوانگەی سوری بۆ مافەکانی مرۆڤ، لەو هێرشەدا 17 ئەندامی چەکدارەکان کوژراوە و چەک و پێداویستییەکانیشیان لەناوبراون.
لەلایەکی دیکەوە وەزارەتی بەرگری ئەمریکا (پەنتاگۆن) لە بەیاننامەیەکدا ئاشکرایکردووە، “ئەم هێرشە ئاسمانیانە پەیامێکی ڕونە کە سەرۆک جۆبایدن بۆ بەرگری لە ئەمریکییەکان و هاوپەیمانی نێودەوڵەتی هەنگاو هەڵدەگرێت”.
بەپێی بەیانەکەی وەزارەتی بەرگری ئەمریکا لەو هێرشانەدا پێگەکانی چەکدارانی “حزبوڵا” و چەکدارانی “سەید الشهداء” کراونەتە ئامانج.
