لیژنەی ئاسایش و بەرگری لە پەرلەمانی عێراق دەڵێت، “دەستپێكردنەوەی موشەكبارانكردنەكان، پەیامی هەندێك گرووپی چەكدارن.”
عەباس سڕوت، ئەندامی لیژنەی ئاسایش و بەرگری لە پەرلەمانی عێراق ڕایگەیاند، “دووبارە گەڕانەوەی موشەكبارانكردنەكان لە بەغداد و شارەكانی تری عێراق، نامە و پەیامن لە هەندێك گرووپی چەكدارەوە كە لە دەرەوەی دەسەڵاتی دەوڵەتن.”
وتیشی، “ئامانج لەو نامانە، ڕەتكردنەوە و دژژایەتیكردنی زیادكردنی هێزەكانی هاوپەیمانیی ناتۆیە لە عێراق.”
بە وتەی ئەو ئەندامەی لیژنەی ئاسایش و بەرگری لە پەرلەمانی عێراق، بڕیارەكەی پەرلەمان بۆ دەركردنی هێزە بیانییەكان لە عێراق، هێزەكانی ئەمریكا و ناتۆش دەگرێتەوە و دەبێت جێبەجێ بكرێت، بە پێچەوانەوە بارودۆخی سیاسی و ئەمنیی عێراق تێكدەچێت.”
مانگانە چەندین جار هێزەكانی ئەمریكا و هاوپەیمانان لە عێراق دەكرێنە ئامانج، دوایینیان هێرشەكەی دوێنێی بەغداد بوو، بەر لە هەفتەیەكیش، هێزەكانی ئەمریكا و هاوپەیمانان لە هەولێر موشەكباران كران.
