محەمەد حەلبووسی سەرۆكی ئەنجومەنی نوێنەران، پێشبینیدەكات خۆپیشاندان لە عێراق و چەندین وڵاتی عەرەبی و خۆرهەڵاتی ناوەڕاستدا سەرهەڵبداتەوە.
ئەمڕۆ پێنجشەممە محەمەد حەلبووسی سەرۆكی ئەنجومەنی نوێنەرانی عێراق رایگەیاند، عێراق رووبەڕووی فشاری دەرەكیی جۆراوجۆر دەبێتەوە و بەهۆی سروشتە جیۆسیاسییەكەیەوە لە لایەن زلهێزانەوە گەمارۆدراوە.
حەلبووسی باسی لەو ئاڵنگارییانە كرد كە بەرۆكی جیهانیان گرتووە، لەوانە گۆڕانی ئاووهەوا، بەرزبوونەوەی پلەكانی گەرمای زەوی، گرفتی تەندروستی، كەمبوونەوەی ئاوی خواردنەوە و ئاودێری كە راستەوخۆ پەیوەستن بە ژیانی مرۆڤەكانەوە و بەرەنگاربوونەوەیان پێویستی بە هەماهەنگیی نێوان هەمووانە.
سەرۆكی ئەنجومەنی نوێنەران وتیشی، ویستی گەلان بۆ ژیانێكی باشتر و ئازادیی بیروڕا، ئەگەری سەرهەڵدانەوەی خۆپیشاندان دێنێتەئاراوە كە رەنگە لە عێراق و وڵاتانی تری خۆرهەڵاتی ناوەڕاستدا خۆپیشاندان بكرێت، “بۆیە پێویستە حكومەتەكان رێكاری پێشوەختە بگرنەبەر بۆ باشكردنی ژیانی گەلانیان”.
