بەڕێوبەرایەتی پۆلیسی ڕاپەڕین، ڕایگەیاند، شۆفێرێک کە بارهەڵگرێکی پێبووە دوای گەڕانەوەی بۆ قەڵادزێ لە ڕێگەدا کۆنترۆڵی لە دەستداوە و دوای دوو کاتژمێر توانراوە دەربهێنرێت، بەڵام پێشتر گیانی لە دەستداوە.
لە ڕاگەیەندراوێکدا کە وێنەیەکی بۆ تۆڕی میدیایی ئێستا نێردراوە تێیدا هاتووە، ” ئێوارەی ئەمڕۆ ٢١ی شوبات، لەسەر ڕێگەی مەرزی کێلێ هاوڵاتییەک کە ئۆتۆمبێلی بارهەڵگری پێ بووە لەکاتی گەڕانەوەی بۆ قەڵادزێ کۆنتڕۆڵی لەدەستدا و پاشان وەرگەڕاوە، دوای دوو کاتژمێر لە ڕووداوەکە لەناو ئۆتۆمبێلەکەیدا لە لایەن هێزەکانمان بە هاوکاری هاوڵاتییان دەرهێندراوە و بەڵام گیانی لەدەستداوە”.
بەپێی ڕاگەیەندراوەکە، ” شۆفێرەکە دوایی ڕووداوەکە دەستبەجێ گواستراوەتەوە بۆ نەخۆشخانەی گشتی قەڵادزێ، بە وتەی کەسوکارەکەشی ڕووداوەکە لەکاتێکدا بووە ویستویەتی بارێکی تەماتە لە مەرزەکە بگوازێتەوە بۆ هەولێر و لە لۆفەیەکی نزیک مەرزەکە وەرگەڕاوە، دوای توێکاری بۆ تەرمەکەی ڕادەستی کەسوکاری کرایەوە”.
