وتەبێژی بەڕێوبەرایەتیی هاتوچۆی هەولێر ڕایگەیاند کە بەیانی ئەمڕۆ شەممە 20ی شوبات لە ڕوداوێکی هاتوچۆدا لەسەر شەقامی 120 مەتری کرێکارێکی شارەوانی گیانیلەدەستدا و یەکێکیش برینداربووە.
لە لێدوانێکدا بۆ تۆڕی میدیایی ئێستا فازڵ حاجی، وتەبێژی بەڕێوبەرایەتیی هاتوچۆی هەولێر وتی، “ڕوداوەکە لە نێوان ئۆتۆمبێلێکی خۆڵ و خاشاکی شارەوانی و بارهەڵگرێکدا ڕویداوە، لەکاتێکدا بەرهەڵگرەکە لە شوێنێکی شەقامی 120 مەتری ڕایگرتووە و لەگەڵ ئەوەی ئیشارەت و سێگۆشەی فسفۆری بۆ ئاگادارکردنەوەی شۆفێران دانابوو بەڵام ئۆتۆمبێلی پاککەرەوەکەی شارەوانی خێراییەکەی لەسەروو 100 بووە و خۆی کێشاوە بە بارهەڵگرەکەدا”.
باسیلەوەکرد کە ئۆتۆمبێلەکەی شارەوانی دوای ئەوەی خۆی کێشاوە بە بارهەڵگرەکەدا وەرگەڕاوە و دواتر خۆی کێشاوە بە ئۆتۆمبێلێکی دیکەشدا، لەئەنجامدا کەسێک کە سەرنشینی تەنیشت شۆفێری ئۆتۆمبیلەکەی شارەوانی بووە گیانیلەدەستداوە و کەسێکی دیکەش کە شۆفێرەکەیە برینداربووە.
بەپێی زانیارییەکانی تۆڕی میدیایی ئێستا ئەوەی گیانیلەدەستداوە برازای شۆفێرەکەیە و ناوی دڵدار فایەقە و تەمەنی 24 ساڵ بووە.
