پسپۆڕانی خۆراك، بوونی بادەم لە ژەمەكانی ڕۆژانەدا بە پێویست دەزانن و خواردنی ئەو خۆراكە بە سەرچاوەیەكی سوودبەخش بە جەستە و دوورخەرەوەی لە چەندین گرفتی تەندروستی و تەنانەت نەخۆشی ئەژماردەكەن.
پێكهاتەی بادەم
چەرەزات و تۆوی ڕووەكەكان بەگشتی و بادەم بەتایبەتی، چەندین ڕەگەز و پێكهاتەی گرنگ لەخۆدەگرن كە بەهای خۆراكییان بەرزە و خواردنیان سوودێكی زۆر بە تەندروستیی مرۆڤ دەگەیەنێت.
دیارترین ئەو مادانەی كە لە پێكهاتەی بادەمدا هەن، بریتین لە مەگنیسیۆم، زینك، پرۆتین، ئۆمیگا 3، ئاسن، كالسیۆم، پۆتاسیۆم، رایبۆفلاڤین، ڤیتامین ئی، بی و چەندین ڤیتامینی تر و ترشی ئەمینی و فایبەر.
سوودەكانی بادەم
نوێترین ئەو توێژینەوانەی لە بواری خۆراكناسیدا كراون، بادەم بە یەكێك لە هەرە باشترین جۆرەكانی چەوری ناوزەد دەكەن و ئاماژە بۆ سوودە ناوازەكانی خواردنی بادەم لەسەر تەندروستیی مرۆڤ دەكەن.
بەشێوەیەكی گشتیی سوودەكانی بادەم بریتین لە:-
*پاراستنی تەندروستیی دڵ و خوێنبەرەكان، بەوپێیەی ڕێژەی كۆلیسترۆڵی زیانبەخش لە خوێندا كەمدەكاتەوە و چەورییە سوودبەخشەكان و ئۆمیگا 3 بە جەستە دەبەخشێت.
*ڕۆنی بادەم هاوشێوەی ڕۆنی زەیتوون سوود بە جەستە دەبەخشێت و گەر گەرم نەكرێت و بە ساردی لەگەڵ خواردەمەنیدا بەكاربهێنرێت، ئەوا تەواوی سوودەكانی دەگەن بە جەستە.
*بوونی ڕێژەیەكی بەرزی كالیسیۆم لە پێكهاتەی بادەمدا، وادەكات خواردنی بەشێوەیەكی بەردەوام گەر بە بڕی كەمیش بێت، ئێسك و ددانەكان بەهێزبكات و مرۆڤ لە پووكانەوەی ئێسك و ئێسكەنەرمە بپارێزێت.
*سوودێكی تری خواردنی بادەم و ڕۆنی بادەم، پاراستنی مرۆڤە لە قەڵەوی و تەنانەت هۆكارن بۆ دابەزاندنی كێشی زیادەی لەش.
*خواردنی بادەم یارمەتیی كرداری هەرسكردن دەدات و ڕیخۆڵەكان نەرم دەكات و هۆكارە بۆ ڕەوانی و قەبزی ناهێڵێت، چونكە بڕێكی باش فایبەر لەخۆدەگرێت.
*جگە لە خواردنی، ڕۆنی بادەم بۆ تەندروستیی ڕووكاری لەش و جوانكارییش بەكاردێت، چونكە پێست نەرم و شێدار دەكات و لە وشكبوون و قڵیشان و تەنانەت هەندێك جۆری نەخۆشی و پەڵە دەیپارێزێت، ئەوەش بەهۆی بوونی بڕێكی باش لە ڤیتامین بی2 لە پێكهاتەكەیدا.
*ڕۆنی بادەم قژ نەرم و بەهێز دەكات و لە مخۆركە و ڕووتانەوە دەیپارێزێت.
*بادەم دژەئۆكسانە و لەش بەگشتی و پێست بەتایبەتی لە زیانەكانی تیشكی خۆر دەپارێزێت.
*بادام بەهۆی بوونی ڕێژەیەكی بەرزی مەگنیسیۆم لە پێكهاتەكەیدا، ژەهرەكان دەردەداتە دەرەوەی جەستە و بەوەش جەستە و خانەكانی لە ژەهراویبوون دووردەخاتەوە.
*جگە لەوەی سەرچاوەیەكی گرنگی وزەیە، خواردنی بادەم دەبێتە هۆكارێك بۆ چالاككردنی بەرگریی لەش و پاراستنی جەستە لە نەخۆشی بەتیایبەت پەتا وەرزییەكان.
*خواردنی بادەم و بەكارهێنانی ئاردەكەی لەبری ئاردی سپی، زۆر بەسوودە بۆ توشبووانی نەخۆشیی شەكرە و ئەگەر چارەسەریشی نەكات، ڕێژەكەی بەڕادەیەكی زۆر دادەبەزێنێت.
*خواردنی بادەم ماسوولكەكان نەرمدەكات و بۆ پاراستنیان لە ڕەقبوون سوودی هەیەكە جگە لە خواردن، دەكرێت ڕۆنەكەی وەك گیراوە بۆ پێست بەكاربهێنرێت.
*بادەم گەر بە ساغی بخورێت یاخود بە هاڕاوی لە شێوەی ئارد بۆ دروستكردنی خواردەمەنی یان وەك ڕۆن بەكاربهێنرێت، چاو لە نەخۆشی دەپارێزێت و توانای بینینی بەهێزدەكات، چونكە بادەم دەوڵەمەندە بە بڕێكی باش لە ڤیتامین ئەی.
*خواردنی بادەم بە بەردەوامی، دەبێتەهۆی پارێزگارییكردن لە خانەكانی لەش و ڕێگری دەكات لە خێرا لەناوچوونیان، هەر ئەو هۆكارەشە وایكردووە بەشێك لە خۆراكناسان بە هۆكارێك بۆ مانەوە بە گەنجی و تەنانەت درێژكردنەوەی تەمەنی مرۆڤ ناوزەدی بكەن.
*بادەم دیارترین سەرچاوەی دروستكردنی كیتۆنە، بۆیە لە ڕژێمی كیتۆدا یەكێكە لە سەرەكیترین خواردەمەنییەكان، بەوپێیەی یارمەتی جەستە دەدات لەبری كاربۆهیدرات و شەكر، كیتۆن بكات بە سەرچاوەی وزە و بەوەش چەوریی زیادەی لەش دەسووتێت و هۆكارێك دەبێت بۆ لەشڕێكی.
*بادەم ڕێژەی شەكر لە خوێندا رێكدەخات و مەنگەنیزی ناو پێكهاتەكەی شەكر لە خوێندا دەمژێت.
