لە قەزای بەردەڕەشی سەربە پارێزگای دهۆک، شەوی ڕابردوو 13ی شوبات منداڵێکی تەمەن هەشت ساڵان دەستکاریی چەکەکەی باوکی کردووە و بەهۆیەوە دایکی کوشتووە و باوکیشی بریندارە.
لەوبارەیەوە سەرچاوەیەک لە نەخۆشخانەی فریاکەوتنی بەردەڕەش بە تۆڕی میدیایی ئێستای وت، “ڕوداوەکە لە كاتژمێر 10ی شه‌وی ڕابردوو ڕویداوە و له گوندی درین له سنوری قه‌زای به‌رده‌ڕه‌شی سه‌ربه پارێزگای دهۆك بووە”.
ئاماژەی بەوەشکرد کە ڕوداوەکە دبەهۆی ئەوەبووە منداڵێكی هه‌شت ساڵان ده‌ستکاری چەکەکەی باوکی کردووە کە لە جۆری کڵاشینکۆف بووە و لەئەنجامدا بە هەڵە دەستیبەرکەوتووە و فیشەک لە چەکەکە دەرچووە.
ڕاشیگەیاند، “لەئەنجامی ڕوداوەکە ژنێک گیانیلەدەستداوە کە دەکاتە دایکی منداڵەکە و باوکیشی بریندارە”.
بەپێی وتەی ئەو سەرچاوەیە، دایکی منداڵەکە تەمەنی 30 ساڵە و باوکی منداڵەکەش تەمەنی 28 ساڵە و ئێستا لەژێر چاودێری پزیشکیدایە.
