بەهۆی ڕوداوێكی هاتوچۆوە لەسەر ڕێگای هەولێر-خەبات، كەسێك گیانیلەدەستدا و دووانی دیكەش برینداربوون، وتەبێژی هاتوچۆ دەڵێت، ڕووداوەكە بەهۆی تیژڕەوی و لەدەستدانی كۆنترۆڵەوە بووە.
فازڵ حاجی، وتەبێژی بەڕێوەبەرایەتیی هاتوچۆی هەولێر ئەمڕۆ پێنجشەممە بڵاویكردەوە، كاتژمێر 05:30ی سەرلەبەیانی ئەمڕۆ لەسەر ڕێگای سەرەکیی (هەولێر- خەبات) لەنێوان کانی قرژاڵە و مەفرەقی تۆبزاوە، ئۆتۆمبیلێکی جۆری میتسوبیشی تایبەت، کە لەسایدی بەرەو هەولێر دەڕۆیشت، بەهۆی تیژڕەوییەوە کۆنتڕۆڵی لەدەستداوە چووەتە سەر سایدەكەی دیكە و خۆیکێشاوە بە کیایەکی بارهەڵگری بچوک.
وتیشی، “لە ئەنجامی ڕووداوەکە سەرنشینێکی میتسوبیشیەکە گیانیلەدەستدا، شوفێر و سەرنشینێکی دیكەش زامداربوون و زیانێکی زۆری مادیش کەوتەوە”.
فازڵ حاجی دەشڵێت، “ڕێنمایی شوفێران دەکەین و تکایان لێدەکەین کاتە زووەکانی بەیانی و چۆڵی شەقامەکان بەهەل نەقۆزنەوە بۆ تیژڕەوی”.
ڕونیشیدەكاتەوە، کێشی ئۆتۆمبێل بەهۆی تیژڕۆییەوە کەم دەکات، هەمیشە کەمبوونی کێشیش هۆکاری سەرەکیە بۆ لەدەستدانی كۆنتڕۆڵ و دروستبوونی ڕووداوی هاتوچۆ.
