ڤایرۆسی کۆرۆنا بەنێو یاریزانانی یانەی ئەتلەتیکۆ مەدریدی ئیسپانیدا تەشەنەیکردووە و ڕێژەی توشبووان لەم یانەیە گەیشتووەتە شەش یاریزان.
سەرەڕای ئەوەی لەگەڵ تەوژمی یەکەمی کۆرۆنا لە ئەوروپا، چەند یاریزانێکی یانەی ئەتلەتیکۆ مەدرید تووشی ڤایرۆسی کۆرۆنا بوون و لە یاریکردن دوورکەوتنەوە، بەڵام دووبارە یانەکە کەوتووتەوە بەر تەوژمی دووەم و لە تواناکانی چەندین یاریزانی بێبەش بووە.
دوای ئەوەی یانەی ئەتلەتیکۆ مەدرید لە ماڵپەڕی فەرمی یانەکەوە توشبوونی هەریەک لە یانیک کاراسکۆ و ماریۆ هێرمۆسۆ و جواو فیلێکس و موسا دیمبیلی ڕاگەیاند، ئەمڕۆ هەریەک لە هیکتۆر هێرێرای مەکسیکی و تۆماس لیماری فەرەنسی بەهەمان شێوە کەرەنتینکران، پێشتریش ڕینان لۆدی و سیمی ڤێرسالکۆ و لویس سوارێز و لوکاس تورێرا و دیێگۆ کۆستا و سانتیاگۆ ئاریاس و دیێگۆ سیمیۆنی ڕاهێنەر تووشی هەمان ڤایرۆس ببون.
بەپێی ڕاگەیانراوێکی ڕۆخی بلانکۆس، هێرمۆسۆ و لیمار بەهەمان شێوە تووشی کۆرۆنا بوون و ئەنجامی پشکنینەکانیان “پۆزەتیڤ” بووە، بەڵام یاریزانانی دیکە ئەنجامی پشکنینەکانیان خاوێن بووە.
ئەتلەتیکۆ مەدرید لەم وەرزەدا بە کۆکردنەوەی 51 خاڵ لوتکەی ڕیزبەندی یانەکانی لالیگای گرتووە، هەروەها یارییەکی دواخراویشیان هەیە و جیاوازیان لەگەڵ نزیکترین ڕکابەریان کە ڕیاڵ مەدرید و بەرشلۆنەیە بۆ هەشت خاڵ فراوان بووە.
