ڕۆژنامەی مارکای ئیسپانی لە ڕێگەی شیکارییەکی ڕۆژنامەوانیەوە، ئاڕاستەی کۆتا پەیامی زێدان لە ڕۆژنامەنوسانەوە ڕووەو ئیدارەی یانەی ڕیاڵ مەدرید دەگۆڕێت.
ڕۆبێرتۆ پالۆمار، ڕۆژنامەنوس و نوسەری ڕۆژنامەی مارکا لە شیکارییەکی ڕۆژنامەوانیدا نوسیویەتی، “زێدان لە پرێس کۆنفرانسی بەر لەڕوبەڕوبوونەوەکان هەمیشە وا دەردەکەوت کە لە ڕاهێنانی یۆگاوە هاتووە، لەسەرخۆ و هزرێکی سافی هەبوو، بەڵام ئەوەی لە کۆتا چاوپێکەوتنی ڕوویدا پێچەوانەبوو، وا دەردەکەوت ڕاهێنەرەکە لە باڕێکی ژێرزەمینیەوە هاتبێت و توڕەیی خۆی بە ڕۆژنامەنوساندا تەقاندەوە”.
سەرچاوەکە ئاماژەی کردووە، ئەوەی ڕۆژنامەنوسان لەبارەی ئەگەرەکانی دوورخستنەوەی زێدان خستویانەتە ڕوو بابەتی دزەکردنی زانیاری بووە لە ژووری جلگۆڕینەکانەوە، نەک داهێنان و دروستکردنی هەواڵ لە هزری خۆیانەوە.
“هەرچییەک هەبێت ڕوبەڕو بیڵێن، بڵێن دەمانەوێت بڕۆیت، نەک لە پشتەوە باسی بابەتەکە بکەن”،
ئەمە وەڵامێکی “زیزۆ”یە بۆ ڕۆژنامەنوسان، داوا دەکات ڕێزیبگرن و بە ڕێزیشەوە باسی بابەتی شکستەکانی و دوورخستنەوەی بکەن، لە کاتێکدا ئەگەر خۆی دەستلەکاربکێشێتەوە بەهیچ شێوەیەک لەکەدار نابێت، بەڵام لە ڕاستیدا دەردەکەوێت پەیامی ڕاهێنەرەکە بۆ ئەو ڕۆژنامەنوسەش نەبووە کە پرسیارەکەی کردووە، بەڵکو بۆ کەسانێکە داهاتووی ڕاهێنەرەکەیان بەدەستە و دەتوانن و بەرز و نزمی پێبکەن (مەبەستی ئیدارەی ڕیاڵە).
پالۆمار دەڵێت، “زێدان مێژوویەکی جوانی لە ڕیاڵ مەدرید هەیە و بە دەستکەوت و کەسایەتیە خەرمانەدارە ئەفسانەییەکەی ڕێز و حورمەتی ڕۆژنامەنوسانی بەدەستهێناوە، بەڵام ئەوەی داوای دەکات لەگەڵ ئەنجامە خراپەکان و کەوتنی یانەشدا (ڕێزیبگیرێت و هیچ نەوترێت) خۆی لە پێش هەمووانەوە دەزانێت لە ڕیاڵ مەدرید بوونی نییە، هیچ ڕاهێنەرێک لێرە بەهۆی ناوەکەیەوە ڕێزدار نابێت، بەڵکو ئەنجامەکانی کاریگەری لەسەر پێگەکەی، یاخود داهاتووی دروستدەکەن.
