یاریزانی تێنسی سەرزەوی ژاپۆنی، ناومی ئۆساکا دوای سەرکەوتنی بەسەر ڤیکتۆریا ئازارینکای بیلاڕووسی نازناوی پاڵەوانیەتی ئەمریکای کراوەی بەدەستهێنا.
پاڵەوانیەتی ئەمریکای کراوە یەکێکە لە چوار پاڵەوانێتییە گەورەکەی بواری تێنسی سەرزەوی و بە “فلاشینگ میدۆز” ناودەبرێت، لەپێناو بەرزبوونەوەی پێگەیان لە ڕیزبەندی یاریزانە پڕۆفیشناڵەکاندا، ساڵانە یاریزانان بەوپەڕی هێزەوە هەوڵی چنینەوەیان دەدەن.
لەم وەرزەدا ناومی ئۆساکای ژاپۆنی گەیشتە یاری کۆتایی و بەرانبەر ڤیکتۆریا ئازارینکای بیلاڕووسی یاریکرد، ژاپۆنیەکە کە لە پێشوودا یەکەمی ڕیزبەندی بووە و ئێستا کەوتووەتە پلەی دەیەمەوە، بە ئەنجامی (1-6)، (3-6)، (3-6) بردنەوەی بەدەستهێنا.
نازناوی ئەمریکای کراوە سێیەم گەورە نازناوی گراند سلامە ئۆساکا لە ژیانی وەرزشیدا بەدەستیدەهێنێت، پێشتر نازناوەکانی ئەمریکای کراوە و ئوسترالیای کراوەی بەدەستهێناوە.
لەبەرانبەردا ڤیکتۆریا ئازارینکای تێنسزانی بیلاڕووسی خاوەنی دوو نازناوی گراند سلامە، هەردووکیان ئوسترالیای کراوەن و هەرگیز لە ژیانی وەرزشییدا نەبووەتە خاوەنی خەڵاتی پاڵەوانی ئەمریکا.
بڕیارە ئەمشەو کاتژمێر (11:00) بەکاتی هەرێمی کوردستان فاینەڵی ئەمریکای کراوە لەسەر ئاستی کوڕان لە نێوان دۆمینیک تیمی نەمسایی و ئەلیکساندەر زڤیرێڤی ئەڵمانی ئەنجامبدرێت.
لەم وەرزەدا و لەسەر ئاستی کوڕان فلاشینگ میدۆز پاڵەوانێکی نوێ بەخۆیەوە دەبینێت، بەوپێیەی ماڵئاواییکردنی نۆڤاک دیۆکۆڤیچ دەرفەتی بۆ هەریەک لە تیم و زڤیرێڤ دروستکردووە نازناوەکە بچننەوە لە کاتێکدا هیچیان نازناوی ئەمریکایان بەدەستنەهێناوە.
