ئەمڕۆ کۆتا وادەیە بۆ گواستنەوەی یاریزانان لە خولەکانی ئیسپانیا، ئیتاڵیا، ئینگلتەرا، فەرەنسا، ئەڵمانیا، بەم هۆیەوە چاوەڕوانی واژووکردنی چەند بۆندێکی گەورە و هەژێنەر دەکرێت.
یانە گەورەکانی ئەوروپا ماوەی دوو مانگ زیاترە کار لەسەر دابینکردنی پێداویستییەکانیان دەکەن، تەنانەت هەندێکیان ڕێککەوتنیان لەگەڵ یاریزاناندا کردووە و تەنها ڕێککەوتنیان لەگەڵ یانە فرۆشیارەکان ماوە، لە کۆتا ساتەکانی میرکاتۆدا هەمیشە وابووە کە یانەکان بە شێوەی کتوپڕ لە داخوازییەکانیان خۆشدەبن و بۆندەکان واژوودەکەن.
چاوەڕواندەکرێت، ئەمشەو تاوەکو کاتژمێر (12:00) بەکاتی ئەوروپا، چەند گواستنەوەیەک بە پەلە ئەنجامبدرێن، گرنگترینیان ئەمانەن:
１. تۆماس پارتێ: یاریزانەکەی ئەتلەتیکۆ مەدرید ڕێککەوتنی لەگەڵ هیچ یانەیەکدا نەکردووە، بەڵام یانەکانی ئارسیناڵ و چێڵسی خواستیان لەسەر گواستنەوەی بووە بەتایبەت چێڵسی، بە دوور نازانرێت لە کۆتا ساتەکاندا پەیوەندی بە یانەیەکی دیکەوە بکات.
２. ئیدینسۆن کاڤانی: یاریزانەکە بە هیچ یانەیەکەوە پەیوەست نییە و هەندێک لە میدیاکانی بەریتانیا دووپاتیدەکەنەوە، لە کۆتا ساتی میرکاتۆی هاوینی 2020 بۆند لەگەڵ مانچستەر یونایتد واژوودەکات.
３. لوکاس تۆرێرا: لە پلانەکانی مایکڵ ئارتێتای ڕاهێنەری ئارسیناڵ دەرکراوە، ڕێککەوتنی لەگەڵ ئەتلەتیکۆ مەدرید کردووە، جەمسەرەکان چاوەڕوانی ڕۆیشتنی هیکتۆر هێرێرا دەکەن بۆ ئەوەی گواستنەوە بە تۆرێرا بکەن بۆ پێگەکەی.
４. مێمفس دیپای: جۆنینیۆی بەڕێوەبەری وەرزشی یانەی لیۆن دانی پێدادەنێت، یاریزانەکە لەگەڵ یانەی بەرشلۆنە ڕێککەوتنی کردووە، واتا ئەمڕۆ بە ئەگەرێکی زۆرەوە بۆندەکەی واژوودەکرێت.
５. ئانتۆنیۆ ڕۆدیگێر: چێڵسی ئامادەیی دەربڕیوە دەستبەرداری بەرگریکارە ئەڵمانییەکەی ببێت، لە بەرانبەردا یانەکانی پاریس سانت جێرمان و تۆتنهام خوستیان بەرانبەر گواستنەوەی نیشانداوە، بەڵام کێشە لەوەدایە چێڵسی بەشێوەی هەمیشەیی داوای گواستنەوەی دەکات و یانە داواکارەکان بە خواستن پێویستیان بە واژووکردنی بۆندەکەیە.
６. عوسمان دیمبیلی: لە پێکهاتەی کومان بووەتە یەدەگی ئانسو فاتی و گواستنەوەی بۆ یانەی مانچستەر یونایتد لە کۆتا ساتی گواستنەوەکاندا ئەگەرێکی بەهێزە.
７. جادۆن سانچۆ: شکستی مانچستەر یونایتد بەرانبەر تۆتنهام دووبارە ئەگەرەکانی گواستنەوەی جادۆن سانچۆیان بۆ مانچستەر یونایتد بەهێزکردووە، دۆرتمۆند دوای بڕی 108 ملیۆن یورۆ دەکات و یونایتد لەهەوڵدایە بە 90 ملیۆن بۆندەکە واژووبکات.
