هەردوو پارێزگای دیالە و بابل لە عێراق، بۆ سبەی یەكشەممە بە فەرمی دەوامیان ڕاگرت، ئەوەش بەهۆی بارانبارینی زۆرەوە كە بووەتە هۆی لافاو.
لە ڕاگەیەندراوێكدا، ئیدارەی پارێزگای دیالە ئەمڕۆ شەممە 6ی شوبات ڕایگەیاند، “پارێزگاری دیالە بڕیاریداوە بە ڕاگرتنی دەوام لە سەرجەم دامەزراوەكانی پارێزگاكە بۆ سبەی یەكشەممە، بەدەر لە دەوامی بەڕێوبەرایەتییە خزمەتگوزارییەكان”.
هۆكاری ڕاگەیاندنی پشووەكەش گەڕێندراوەتەوە بۆ، بوونی لافاو بەهۆی بارانبارینی زۆرەوە.
لەلایەكی دیكەوە لە ڕاگەیەندراوێكی دیكەدا، پارێزگاری بابل ئاشكرایكردووە، بڕیاریانداوە بە ڕاگرتنی دەوام لە سنووری پارێزگاكە بۆ سبەی یەكشەممە بەهۆی بارانی بەخووڕ و لافاوەوە.
ماوەی دوو ڕۆژە بە بەردەوامی باران لە زۆربەی پارێزگاكانی عێراق دەبارێت، ئەمڕۆش لە هەریەك لە پارێزگاكانی واست و دیوانیە پشوو ڕاگەیەندرا بەهۆی بارانێكی زۆرەوە.
لای خۆشییەوە بەهۆی ئەو بارانە بەخووڕەی دەبارێت، دەستەی كەشناسیی عێراق هۆشداری دا لە دروستبوونی لافاو لە بەشێك لە پارێزگاكانی عێراق.
