قوباد تاڵەبانی، جێگری سەرۆکوەزیرانی هەرێمی کوردستان ڕایگەیاند، دانیشتووانی چەمچەماڵ، تەکیە، ئاغجەلەر و گوندەکانی ئەو دەڤەرە ساڵانێکی زۆرە بە دەست کێشەی کەمئاوییەوە دەناڵێنن.
دەشڵێت، هەربۆیە پڕۆژەی ئاوی گۆپتەپە – چەمچەماڵ ئەولەوییەتی ئێمەیە و بە هەر نرخێک بێت، دەبێت لە وادەی دیاریکراوی خۆیدا تەواوبکرێت.
وەک قوباد تاڵەبانی ئاماژەی پێکردووە، “ئەمڕۆ پڕۆژەکەم بەسەرکردەوە، تا ئێستا %50ـی کارەکانی تەواوبووە. سوپاسی کۆمپانیای جێبەجێکار و ئەندازیاران و کرێکارانی پڕۆژەکەم کرد. دڵنیام کردنەوە هەموو پێداویستییەکانیان بۆ دابیندەکەین و ڕێگەنادەین کارکردن لە پڕۆژەکە پەکی بکەوێت، چونکە ئەمە کەمترین خزمەتە کە بتوانین پێشکەشی خەڵکە خۆشەویستەکەمان لە چەمچەماڵ و دەوروبەری بکەین”.
