پۆلیسی دارستان و ژینگەی سلێمانی ڕایدەگەیەنێت، دوای بڵاوبوونەوەی پۆستێک لە تۆڕە کۆمەڵایەتییەکان، سەبارەت بە دووکەڵی کارگەکان و پیسبوونی ژینگە، تیمەکانی بنکەکەمان بەدواداچوونی مەیدانی و وردیان بۆ ئەم بابەتە دەستپێکرد.
بەڕێوەبەرایەتیی پۆلیسی دارستان و ژینگەی پارێزگای سلێمانی لە ڕاگەیەندراوێکدا بڵاویکردەوە، مەفرەزەیەکی بنکەی پۆلیسی دارستان و ژینگەی عەربەت ڕەوانەی شوێنی دیاریکراو کرا بەمەبەستی پشکنین و دۆزینەوەی سەرچاوەی دووکەڵەکە.
ئاماژەی بەوەشکرد، دوای بەدواداچوونی ورد، کارگەیەک دیاریکرا کە هۆکاری سەرەکیی دروستبوونی ئەو دووکەڵە چڕە بووە کە ببووە هۆی تێکدانی ژینگەی ناوچەکە.
بەڕێوەبەرایەتییەکە باسی لەوەشکرد، دادوەری لێکۆڵینەوەی شارەزوور لە بابەتەکە ئاگادارکرایەوە و لەسەر فەرمانی دادوەر، پەڕاوی لێکۆڵینەوەی بۆ کراوەتەوە لە بنکەی ناوبراو، کارگەکە درایە دادگا و فەرمانی دەستگیرکردن بۆ خاوەنەکەی دەرچوو.
