وەزارەتی کارەبای حکومەتی هەرێمی کوردستان لە ڕاگەیەندراوێکدا ئاشکرایکرد، لەلایەن تیمە تەكنیكییەكانی هەردوو وەزارەتی سامانە سروشتییەكان و كارەبا و بە هەماهەنگی لەگەڵ تیمەكانی هەردوو كۆمپانیای كار و داناغاز لە ماوەی شەش کاتژمێردا توانیویان بە سەركەوتوویی بۆریی نوێی گازی كێڵگەی كۆرمۆر بە وێستگەی بەرهەمهێنانی كارەبای سلێمانی ببەستنەوە.
ئاماژەی بەوەشداوە، لەکاتی بەستنەوەی بۆرییە نوێیەکە پشت بە وێستگەکانی دیکەی کارەبا بەستراوە، بەمەش ڕێگریکرا لەوەی کاریگەرییەکی ئەوتۆ لەسەر ماوەی پێدانی کارەبا دروستببێت.
وەزارەتی کارەبا جەختیکردەوە، بەهۆی ئەو پڕۆژەیەوە ئاستی بەرهەمهێنانی کارەبا لە وێستگەی کارەبای سلێمانی زیاد دەکرێت.
