وەزارەتی نەوتی عێراق، داهاتی مانگی ڕابردووی فرۆشتنی نەوتی ئاشكراكرد.
لە ڕاگەیەندراوێكدا كە ئەمڕۆ دووشەممە 1ی شوبات بڵاویكردووەتەوە، وەزارەتی نەوتی عێراق ڕایگەیاند، “كۆمپانیای بەبازاڕكردنی نەوتی عێراق “سۆمۆ”، ئاماری كۆی هەناردە و داهاتی نەوتی خاوی لە مانگی كانونی دووەمدا ئاشكراكردووە.”
وەك ڕاگەیەندراوەكە دەڵێت، “لە مانگی كانونی دووەمی ڕابردوودا، 88 ملیۆن و 922 هەزار و 697 بەرمیل نەوتی خاو لە عێراقەوە هەناردەی بازاڕەكانی جیهان كراون.”
ئاشكراشیكردووە، كۆی داهاتی نەوتی فرۆشراوی مانگی كانونی دووەم، نزیكەی 4 ملیار و 739 ملیۆن و 82 هەزار دۆلار بووە.
وەزارەتی نەوتی عێراق ڕوونیكردووەتەوە، ئەو نەوتەی فرۆشراوە، نزیكەی 85 ملیۆن و 870 هەزار و 503 بەرمیلی لە كێڵگەكانی ناوەڕاست و باشووری عێراقەوە هەناردەكراوە.
سەبارەت بە هەناردەكردنی نەوت لە كەركوكەوە، وەزارەتی نەوتی عێراق دەڵێت، “لە مانگی ڕابردوودا 3 ملیۆن و 52 هەزار و 194 بەرمیل نەوتی كەركوك لەڕێگەی بەندەری جەیهانەوە هەناردەی دەرەوە كراوە.”
