نرخی نەوتی خاو ئەمڕۆ سێشەممە 2ی شوبات لە بازاڕەكانی جیهاندا بەرزبووەوە.
بەرمیلێك خاوی برێنت 61 سەنت چووەسەر نرخی پێشووی و ئەمڕۆ بە 56.95 دۆلار مامەڵەی پێوەكرا، بەوەش نرخی ئەو جۆرەی نەوتی خاو بە ڕێژەی 1.10% بەرزبووەوە.
هاوشێوەی نەوتی برێنت، نرخی نەوتی خاوی ئەمریكیش بەرزبووەوە و هەر بەرمیلێكی 62 سەنتی چووەتەسەر و بە 54.15 دۆلار مامەڵەی پێوەدەكرێت و ڕێژەی 1.12% نرخەكەی زیادیكردووە.
ڕووپێوییەكی بەرهەمی ئۆپیك دەریخستووە كە نرخی نەوت تا مانگی كانونی دووەمی ڕابردوو، بۆ حەوت مانگی لەسەر یەك بەرزبووەتەوە.
شارەزایانی بواری نەوت پێشبینی دەكەن نرخی نەوتی خاو زیاتریش بەرزببێتەوە و هەر بەرمیلێكی بگاتە 65 دۆلار، ئەوەش بەهۆی پابەندبوونی وڵاتانی بەرهەمهێنی نەوت بە كەمكردنەوەی بەرهەمهێنان لەلایەك و زۆربوونی خواست لەسەر نەوت لەلایەكی ترەوە، كە لە ئەنجامی پاشەكشەی بڵاوبوونەوەی پەتای كۆرۆنا و بووژانەوەی بازاڕەكانی جیهانەوە هاتووەتەئاراوە.
