بەڕێوەبەری کشتوکاڵی سلێمانی، رایگەیاند، هەناردەکردنی مریشک و هێلکەی هەرێمی کوردستان بۆ عێراق نابێتە هۆی بەرزبوونەوەی نرخ.
شاڵاو جەمال، بەڕێوەبەری کشتوکاڵی سلێمانی، بە تۆڕی میدیایی ئێستای راگەیاند، نزیکترین، باشترین و خێراترین بازاڕ بۆ بەرووبوومە کشتوکاڵییەکان بە گشتی و بەرووبوومە پەلەوەرییەکانی هەرێمی کوردستان بەتایبەتی، شارەکانی ناوەڕاست و باشووری عێراقن.
وتیشی، ئەو بڕیارەی لەلایەن حکومەتی عێراقەوە دەرچووە بۆ هاوردەکردنی مریشک و هێلکە لە هەرێمی کوردستانەوە دەرفەتێکی باشە بۆ ئێمە.
لەبارەی چۆنیەتیی پرۆسەکەوە شاڵاو جەمال وتی، گرێبەست لەگەڵ کێڵگە پەلەوەرییەکان دەکرێت و بۆ هەر کێڵگەیەک بڕی %50ی بەرهەمی ئەو کێڵگەیە هەناردەی ناوەڕاست و باشووری عێراق دەکرێت دوای ئەوەی لە پشکنین دەردەچن.
پەیوەست بە نرخ، ئاماژەی بەوەکرد، لە هەرێمی کوردستان ژمارەیەکی زۆر کێڵگەی پەلەوەرییمان هەیە و بەرهەمەکانیان دوو هێندەی پێداویستیی ناوخۆیە و لەبەر ئەوە نابێتە هۆی بەرزبوونەوەی نرخ، بەپێچەوانەوە کاریگەریی ئەرێنی دەبێت.
