گەمارۆکانی هێزەکانی ئاسایشی هەولێر بۆ سەر گوندی لاجان بەردەوامن و تاوەکو ئێستاش هەمەڕ، باجەر و چەکە قورسەکان نەکشێندراونەتەوە.
سەرچاوەیەک لە گوندی لاجان سەبارەت بە دواین پێشهاتەکانی گوندەکە، ئاشکرایکرد، ژمارەیەک لە نوێنەرانی گوندەکە لەگەڵ وەزارەتی ناوخۆ و ئاسایشی هەولێر کۆبوونەوە، بەڵام ئاسایشی هەولێر لە بەرامبەردا داوای ژمارەیەک گەنجی گوندەکەیان کردووە کە گوایە بەشداربوون لە گردبوونەوەکەی دوێنێ.
وتیشی، ئاسایشی هەولێر هەڕەشەی کردووە و بە نوێنەرانی گوندەکەیان راگەیاندووە کە دێن بۆ دەستگیرکردنی ئەو گەنجانە و هەرکەسێک رووبەڕوویان ببێتەوە سزادەدرێت، هەروەها ئەو گەنجەی دوێنێ بە ناوی ‘شکور’ دەستگیرکرا تاوەکو ئیستا ئازادنەکراوە و بریندارەکانیش وەک تۆمەتبار مامەڵەیان لەگەڵدا دەکرێت.
ئەوەشی خستەڕوو، یەکێک لە بریندارەکان منداڵێکی تەمەن هەشت ساڵە و فیشەک بەر سکی کەوتووە، هەروەها ئەو کەسانەشی کە دەستگیرکرابوون و ئازادکران، ئازار و ئەشکەنجەی زۆر دراون.
