بەپێی ئامار و بەڵگەکان، کەرتی تەندروستی لە سنووری پارێزگای سلێمانی لە رووی پێشکەشکردنی خزمەتگوزارییەوە لەسەر ئاستی هەرێم و عێراق، پێشەنگە.
بەپێی ئامار و ژمارەکانی راپۆرتێک، لە سلێمانی کۆمەڵێک دەزگا و نەخۆشخانەی تەندروستی گەورە هەن، کە لەسەر دەستی سەرۆک مام جەلال دروستکراون یان بودجەیان بۆ تەرخانکراوە و پلان و پرۆژەی ئەون، لەوانە، نەخۆشخانەی شۆڕش، نەخۆشخانەی هیوا، کە پێشەنگی ئەو نەخۆشخانانەیە لە بواری شێرپەنجەدا خزمەت دەکەن، نەخۆشخانەی پسپۆڕییەکانی دڵ و سەنتەری ژیانەوە.
لە راپۆرتەکەدا هاتووە، لە سنووری سلێمانی 14 نەخۆشخانەی پسپۆڕیی ورد و 21 سەنتەری پسپۆڕیی ورد هەن، هەروەها 252 بنکە و مەڵبەندی دیکەی تەندروستی هەن کە نەک تەنیا خزمەتی هەرێمیان کردووە، بەڵکو لە تەواوی عێراقەوە هاوڵاتییان روو لەو سەنتەر و نەخۆشخانانە دەکەن.
هەر بەپێی راپۆرتەکە، لە سلێمانی کۆمەڵێک نەشتەرگەریی قورس ئەنجامدەدرێن کە زۆرجار وەک مەحاڵ دەبینرێن، لەوانەش چاندنی جگەر و گورچیلە، بواری مێشک و دەمار، هەروەها لە بواری نەخۆشییەکانی دڵیشدا پێشەنگە.
