فەرماندەی هێزەکانی کۆماندۆ رایگەیاند، بە ئەرکی خۆمانی دەزانین لە پێناو چەسپاندنی یاسا خەبات بکەین و بە توندترین شێوازیش سزای ئەوانە بدەین کە لە یاسا دەرچوون و رێزی یاساکان ناگرن.
دیار عومەر فەرماندەی هێزەکانی کۆماندۆ لە لێدوانێکدا رایگەیاند، “هەرکەسێک لە هەر پلە و پێگەیەکدا بێت، دەبێت ملکەچی یاسا و دادگا بێت، کاتێک دادگا بانگهێشتی دەکات دەبێت بە دەم داواکەوە بچێت و بە هەموو شێوەیەک هەوڵی پاراستنی یاسا و چەسپاندنی یاساکان دەدەین”.
دەربارەی ئارامبوونەوەی دۆخەکەش، ئاماژەی بەوەدا، “دۆخەکە ئارامە و هیچ شەڕ و پێکدادانێک نەماوە، ئەوانەی لە یاسا دەرچووبوون دەستگیرکراون و رادەستی دادگا کراون، ئەوەی ئەرکی ئێمە بوو ئەنجامماندا، رێگەش نادەین هیچ کەسێک لە یاسا دەربچێت و هێز بەکاربهێنێت”.
وتیشی، “ئەو ئاسایشەی وڵاتەکەمان هەیەتی یەکێکە لە دەستکەوتە مەزنەکانی گەلەکەمانە و گەلەکەمان شانازی پێوەدەکات، رێگەش نادەین هیچ کەسێک ئەم ئارامییە تێکبدات”.
