بەرپرسی تیمی راگەیاندنی کۆمسیۆنی باڵای هەڵبژاردنەکان رایدەگەیەنێت، لیژنەی تایبەت بۆ چاودێریکردنی بانگەشەی هەڵبژاردن پێکدەهێنرێت و هێزە ئەمنییەکانیش رۆڵی بەرچاویان لە پاراستنی هەڵمەتەکەدا دەبێت.
عیماد جەمیل، بەرپرسی تیمی راگەیاندنی کۆمسیۆنی باڵای هەڵبژاردنەکانی عێراق لە لێدوانێکدا رایگەیاند، “ئەرکی لیژنە تایبەتەکان بریتییە لە چاودێریکردنی هەڵمەتی بانگەشە و تۆمارکردنی ئەو کارە تێکدەرانەی کە روودەدەن وەک دڕاندنی پۆستەر، شێواندنی وێنەی کاندیدەکان و شێواندنی دروشمەکان”.
وتیشی، “لیژنەکان رۆڵیان لە چاودێریکردنی تۆڕە کۆمەڵایەتییەکان، دەزگاکانی راگەیاندنیشدا دەبێت و رێوشوێنی توند دەگرنەبەر”.
جەختی لەوەشکردەوە، “هەموو ئەو کەس و لایەنانەی کە سەرپێچی رێنماییەکانی کۆمسیۆن دەکەن، رووبەڕووی سزای یاسایی دەبنەوە، سزاکانیش پێبژاردن و بەندکردن لەخۆدەگرێت”.
