کەشناسێک رایدەگەیەنێت، پێشبینی دەکرێت هەفتەی داهاتوو لەم هەفتەیە گەرمتر ببێت و شەپۆلێکی دیکەی گەرما سەرجەم ناوچە جیاوازەکانی هەرێم و عێراق دەگرێتەوە.
شاڵاو هیدایەت، شارەزای بواری کەشناسی بڵاویکردەوە، پێشبینی دەکرێت لە هەفتەی داهاتوودا بەهۆی بەردەوامی و زیادبوونی نزمە پاڵەپەستۆی گەرمی وەرزی زەریای هندی و باڵادەست بوونی بەرزە پاڵەپەستۆیەک لە چینی 500 ملیباری، هەفتەی داهاتوو لەم هەفتەیە گەرمتر دەبێت و کاریگەریی شەپۆلە گەرماکە بۆ ماوەی هەفتەیەک لەسەر ناوچەکان دەمێنێتەوە.
ئاماژەی بەوەشکردووە، ”لەو ماوەیەدا پلەکانی گەرمی لە سەرووی ئاساییەوە دەبن و لە ناوچەکانی باشوور و ناوەڕاستی عێراق زۆرترین کاریگەریی گەرماکەیان لەسەر دەبێت و ئەگەر هەیە تاوەکو چەند پلەیەک بچێتە سەرووی 50 بۆ ناوچەکانی هەرێم و زۆرترین کاریگەری لەسەر ناوچەکانی خۆرئاوا و گەرمیان دەبێت کە تاوەکو نزیک پەنجا پلە یاخود زیاتر دەبێت”.
دەشڵێت، ”بۆ ئەو شارانەی نزیک شاخەکانن وەک سلێمانی، هەڵەبجە، رانیە، دەربەندیخان، کۆیە، حاجیاوا، قەڵادزێ، سۆران، زاخۆ و دهۆک 44 بۆ 46 پلە یاخود زیاتر دەبێت و لە ناوچە کوێستان و شاخاوییه بەرزەکان نزیکەی 40 پلە دەبێت”.
ئەو کەشناسە رێنمایی بە هاوڵاتییان دەدات و دەڵێت، ”پێویستە لەنێوان کاتژمێر 10:00ی پێش نیوەڕۆ بۆ 4:00ی عەسر خۆتان لە تیشکی خۆر بپارێزن بەهۆی بەرزیی تیشکی سەروو وەنەوشەیی، چونکە ئەو تیشکە زیانی هەیە بۆ پێست، چاو و هەروەها هۆکارە بۆ شێرپەنجە، ئەوانەشی کاریان لەدەرەوە هەیە پێویستە چاویلەکەی تایبەت لەچاوبکەن یاخود چەتر و کڵاو و دەرمانی دژەخۆر بەکاربهێنن”.
