جێگری وتەبێژی وەزارەتی دەرەوەی ئەمریکا رایدەگەیەنێت، پێشوازی لە بڕیارەکەی حکومەتی لوبنان بۆ داماڵینی چەک لە سەرتاسەری وڵاتەکە، دەکەین.
تۆمی بیگۆت، جێگری وتەبێژی وەزارەتی دەرەوەی ئەمریکا لە کۆنگرەیەکی رۆژنامەوانیدا رایگەیاند، “ئەمریکا تەنیا قسەی ناوێت؛ بەڵکو دەمانەوێت بە کرداری داماڵینی چەک لە لوبنان ببینین”.
وتیشی، واشنتن بە وردی چاودێریی پێشهاتەکانی لوبنان دەکات و داواشی لە سوپای لوبنان کرد، بەتەواوی پابەندی داماڵینی چەک بێت و هەنگاوی خێرا بۆ جێبەجێکردنی بڕیارەکەی حکومەت بگرێتەبەر.
ئێوارەی ئەمڕۆ، حکومەتی لوبنان رەزامەندییدا لەسەر پلانێکی پێشنیازکراوی ئەمریکا بۆ داماڵینی چەک لە تەواوی وڵات [بە حزبوڵاشەوە] تاوەکو کۆتایی ئەمساڵ، لەگەڵ کۆتاییهێنان بە ئۆپراسیۆنە سەربازییەکانی ئیسرائیل و کشانەوەی هێزەکانی لە پێنج شوێنی باشووری لوبنان.
