ئەمشەو، چوارشەممە ڕوبەڕوبوونەوەیەکی یەکلاکەرەوەی قۆناغی چارەکی کۆتایی جامی ئیتاڵیا لە نێوان یوڤانتۆس و سپال ئەنجامدرا و یوڤی براوە بوو.
لە قۆناغی چارەکی کۆتایی “کۆپا ئیتاڵیا” لە یاریگای ئالیانز، یانەی یوڤانتۆس بە ئەنجامی چوار گۆڵی بێبەرانبەر بردنەوەی تۆمارکرد.
گۆڵەکان لە خولەکەکانی 16 و 33 و 78 و 90 لەلایەن ئەلڤارۆ مۆراتا، جیانلوکا فرابۆتا، دیان کولۆسێڤیسکی و فیدریکۆ کیێزاوە تۆمارکران.
خانمە پیرەکە بە پێکهاتەیەکی نیمچە یەدەگەوە لە تایمەکانی یەکەم و دووەم باڵادەستبوو، ڕێگەیان بە ڕکابەرەکەیان نەدا هەوڵی تۆمارکردنی ئەنجامی چاوەڕواننەکراو بدات.
بەپێی ئەنجامە تۆمارکراوەکە، یوڤانتۆس هاوشانی یانەکانی ئینتەرمیلان و ئاتالانتا سەرکەوتنی بۆ قۆناغی نیوەی کۆتایی مسۆگەرکرد، لەو قۆناغەشدا بەرانبەر ئینتەر یاریدەکات، هەروەها یانەی ئاتالانتا لە چاوەڕوانی براوەی نێوان ناپۆلی و سپیزیا دەبێت.
