هیلاری كلنتن و كچەكەی بڕیاریانداوە، زنجیرە فیلمێك بەرهەم بهێنن كە چیرۆكەكەی باس لە شەڕی شەڕڤانە ژنەكانی ڕۆژئاوای كوردستان دەكات دژ بە داعش.
پێگەی هۆڵیوود ڕیپۆرتەر ئاشكرایكردووە، زنجیرە فیلمی “كچانی كۆبانی” سەدان كاتژمێر چاوپێكەوتن و ڕاپۆرتی مەیدانی لەخۆ دەگرێت و باس لە شەری ژن و كچە شەڕڤانەكانی ڕۆژئاوای كوردستان دژ بە داعش و هاوكارییە سەربازییەكانی ئەمریكا دەكات لەو شەڕەدا.
ئەو پێگەیە ئەوەشی ئاشكراكردووە، هیلاری كلنتن، وەزیری دەرەوەی پێشووتری ئەمریكا و چیڵسی كچی لەڕێی كۆمپانیایەكی تایبەتی خۆیانەوە زنجیرە فیلمێك لەبارەی تێكۆشانەكانی ژنانی شەڕڤان بەرهەمدەهێنن.
هیلاری لەوبارەیەوە ڕایگەیاندووە، “كچانی كۆبانی گێڕانەوەیەكی نائاسایی ژنانی تێكۆشەرە كە لە پێناو دادپەروەری و یەكسانی دەجەنگن”.
تۆڕی سی ئێن ئێن-ی ئەمریكی ئاشكرایكردووە، “كچانی كۆبانی” گێڕانەوەی چیرۆكێكی ڕاستەقینەی ئەو گروپە كچ و ژنانەیە كە هاوكار بوون لە دەرپەڕاندنی داعش لە باكووری سوریا.
