وتەبێژی کارەبای هەرێم رایگەیاند، “بەمزووانە نرخی کارەبای 24 کاتژمێری دیاریدەکرێت”.
ئومێد ئەحمەد، وتەبێژی وەزارەتی کارەبای هەرێم، بە تۆڕی میدیایی ئێستای راگەیاند، “بەمزووانە نرخی کارەبای 24 کاتژمێری یەکلادەبێتەوە و دیاریدەکرێت”.
وتیشی، “لەسەر بڕی پارەکە سەرجەم لایەنەکان کۆبووینەتەوە و رای لایەنی ئەکادیمی، پسپۆڕ لە وزەی کارەبا و شارەزای ئابوری وەرگیراوە هەموومان پێداگرییان لەسەر ئەوە کردووە کە نرخەکە بەجۆرێک بێت پاڵپشتی لە کەسانی کەمدەرامەت بکات و لە بەرژەوەندیی ئەواندا بێت”.
لەبارەی وەستانی بەرهەمهێنانی کارەبا لە وێستگەی کارۆئاویی دوکان، ئومێد ئەحمەد وتی، “پشت بەو ئاوە گلدراوە دەبەستێت کە لە بەنداوەکەدا هەیە، بەڵام ئێستا وەرزی گلدانەوەی ئاو لە کۆتاییدایە و رێژەی بارانبارینی بەهار و زستانیش دڵخۆشکەر نەبوو بۆ ئەوەی بەرهەمهێنانی کارەبا لە وێستگەکەدا بەردەوامبێت، بڕەکەی 40 مێگاوات بوو رەنگە کاریگەریی کەمبوونەوەی 10 بۆ 15 خولەک کارەبای هەبێت، ئەوەش کاریگەرییەکی کەمە”.
باسی لەوەشکرد، “کاریگەریی نەمانی بەرهەمهێنانی کارەبا لە وێستگەی کارۆئاویی دوکاندا لەسەر نزمیی ڤۆڵتییە لە دوکان و ناوچەکانی دەوروبەری بەتایبەت بۆ وەرزی هاوین کە ئامێرەکانی فێنککەرەوە بەکاردەهێندرێن و پێویستیان بە ڤۆڵتییەیە”.
