بەڕێوەبەرایەتیی بەرگریی شارستانیی سۆران رایدەگەیەنێت، بەهۆی شۆرتی كارەباوە ئاگر كەوتەوە و بەشێكی ماڵێك لە ناوەندی قەزای سۆران سووتا.
بەپێی راگەیەندراوێكی بەڕێوەبەرایەتیی بەرگریی شارستانیی سۆران كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەمڕۆ چوارشەممە ئاگاداركراینەوە كەوا رووداوێكی ئاگركەوتنەوە لە ماڵێك لە گەڕەكی هەرێم لە ناوەندی قەزای سۆران هەیە.
هەر لە راگەیەندراوەكەدا هاتووە، دوو تیم لە بنكەكانی بەرگریی شارستانیی سۆران و دیانا و تیمی رزگاركردنی سەر بە بەرێوەبەرایەتیمان دەرچوون بۆ شوێنی رووداوەكە و دوای گەیشتنی تیمەكان توانرا ئاگرەكە كۆنترۆڵبكرێت.
ئاماژە بۆ ئەوەش كراوە، بەپێی راپۆرتی تیمی ناوبراو، هۆكاری كەوتنەوەی ئاگرەكە شۆرتی كارەبا بوو و رووداوەكە تەنها زیانی ماددی هەبووە.
