دەستەی گشتیی کەشناسی و بومەلەرزەزانیی عێراق پێشبینی دەکات، لە رۆژانی کۆتایی مانگی رەمەزاندا، پلەی گەرمی بەرزببێتەوە.
کەشناسیی عێراق لە بەیاننامەیەکدا رایگەیاند، سبەی چوارشەممە، لە ناوچەکانی هەرێمی کوردستان و ناوەڕاستی عێراق، ئاسمان ساماڵ و نیمچەهەور دەبێت، هاوکات لە ناوچەکانی باشوور ئاسمان ساماڵ دەبێت و پلەی گەرمی کەمێک بەرزدەبێتەوە.
ئاماژەی بەوەشکرد، کەشوهەوای رۆژی پێنجشەممە لە سەرتاسەری وڵات نیمچەهەور و هەور دەبێت، لە هەرێمی کوردستان و ناوچەکانی ناوەڕاستیش، پلەی گەرمی هاوشێوەی رۆژی پێشوو دەبێت.
لەبارەی کەشوهەوای رۆژی هەینییەوە، کەشناسیی عێراق دەڵێت، بەگشتی زۆربەی کاتەکان هەور دەبێت، پلەی گەرمی لە هەرێم و ناوچەکانی ناوەڕاست، چەند پلەیەک بەرزدەبێتەوە و لە ناوچەکانی باشووریش بەرزتر دەبێتەوە.
بەپێی پێشبینییەکانی کەشناسی، رۆژی شەممەش، کە کۆتاییەکانی مانگی رەمەزانە، هەور دەبێت و پلەی گەرمییش زیاتر بەرزدەبێتەوە.
هاوکات بەڕێوەبەرایەتیی گشتیی کەشناسی و بومەلەرزەزانیی هەرێمیش رایگەیاند، ئەمڕۆ سێشەممە ئاسمان ساماڵ و پەڵەهەور دەبێت و پلەی گەرمییش، بەگشتی بەرزدەبێتەوە بە (2-3) پلە بەراورد بە تۆمارەکانی دوێنێ .
دەشڵێت، سبەی چوارشەممە، ئاسمان ساماڵ و پەڵەهەور دەبێت و لە ناوچە شاخاوییەکان نیمچەهەور دەبێت، پلەی گەرمییش بە 1-2 پلە بەرزتردەبێتەوە بەراورد بە تۆمارەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی
هەولێر : 25 پلەی سیلیزی
سلێمانی : 22 پلەی سیلیزی
دهۆک : 22 پلەی سیلیزی
کەرکوک : 26 پلەی سیلیزی
زاخۆ : 24 پلەی سیلیزی
هەڵەبجە : 22 پلەی سیلیزی
سۆران : 21 پلەی سیلیزی
حاجی ئۆمەران : 14 پلەی سیلیزی
گەرمیان :27 پلەی سیلیزی
