سەرۆكی شارەوانیی ئیستانبوڵ پاش بڕیاری دەستگیركردنی بەتۆمەتی گەندەڵی و رەوانەكردنی بۆ زیندان؛ یەكەم هەڵوێستی خۆی راگەیاند و دەڵێت، “خۆڕاگر دەبم و چۆكدانادەم”.
ئەكرەم ئیمامئۆغڵو، سەرۆكی شارەوانیی ئیستانبوڵ و تۆمەتبار بە دۆسیەی گەندەڵی پاش بڕیاری دەستگیركردنی یەكەم هەڵوێستی خۆی لە راگەیەندراوێكدا راگەیاند و بڵاویكردەوە، “ئەم بڕیارە پەڵەیەكی رەشە بە ناوچەوانی دیموكراسییەت لە وڵاتەكەمان و پێكەوە رووبەڕووی دەبینەوە و ئەم پەڵە رەشە لە دیموكراسییەتی وڵاتەكەمان رادەماڵین”.
ئاماژەی بەوەشكردووە، “سەربەرز و خۆڕاگر دەمێنمەوە و هەرگیز چۆك دانادەم، ئەوانەی ئەم كارەیان بەرامبەر ئەنجامداین رێگریان لێدەكەین، وەڵامیان دەدەینەوە و سزایان دەدەین”.
لە ئێستادا لایەنگرانی پارتی گەلی كۆماری ئۆپۆزسیۆنی توركیا (CHP) سەرەڕای ناڕەزایەتییەكانیان بەردەوام لە دەنگدانی ناوخۆیی بۆ هەڵبژاردنی كاندید بۆ پۆستی سەرۆكایەتی توركیا و بە ئەگەری زۆرەوە ئەندامانی پارتەكە ئەكرەم ئیمامئۆغلو دەكەنە نوێنەری پارتەكەیان بۆ رابەرایەتی و كاندیدبوون بۆ پۆستی سەرۆكی توركیا.
