گرفت یان نەخۆشیی بینین بەهۆى شاشەوە لە ئاکامى زۆر بەکارهێنانى کۆمپیوتەر یان مۆبایل و ئایپادەوە دێتە ئاراوە.
دکتۆر ئیگۆر مالیاتسینسکى، پسپۆڕى نەشتەرگەریی چاو دەڵێت، نیشانەکانى بریتین لە ئازارى ناو چاو، وشکبوونەوەى چاو و تێکچوونى بینین.
دەشڵێت، ئەو گرفتانەى بەهۆى شاشەوە دروستدەبێت، تەنها نەخۆشییەک نییە، بەڵکو کۆمەڵێک نیشانەى پەیوەستن بە ماندووکردنى چاو و زیادەڕەوى لە بەکارهێنانیدا.
هۆکارە سەرەکییەکانى روودانیشى بریتین لە کارکردن بۆ ماوەیەکى زۆر لە بەردەم شاشە، شوێنى کارکردن یان دانیشتنى نەگونجاو و رووناکى کەم، کەمکردنەوەى چاو تروکاندن، بەکارهێنانى چاویلکە یان هاوێنەى لکاوى هەڵبژێردراو بە شێوەى نادروست، هەموو ئەمانە دەبنە هۆى ماندووکردنى چاو، وشکبوونەوەى، هەستکردن بە قورس بوونى چاو، تێکچوونى بینین و هەستى ناخۆشى دیکە.
ئەو پسپۆرە بۆ رێگرى لە تووشبوون بەو نەخۆشییە، چەند رێوشوێنێک پێشنیار دەکات:
– وەرگرتنى پشووى رێکخراو لەکاتى دانیشتن بەرامبەر شاشە هەر 20 خولەک جارێک و، جوڵاندنى چاو بۆ شتێک لە دوورى شەش مەتر یان زیاتر سەیرکردنى بۆ ماوەى 20 چرکە.
– رێکخستنى شوێنى کار بەشێوەیەکى گونجاو بەجۆرێک شاشەکە لە ئاستى چاوت یان کەمێک خوارتردا بێت و دوورییەکەشى لەنێوان نزیکەى 50-70 سم بێت.
– بوونى رووناکى گونجاو لە شوێنى کارکردن یان شوێنى دانیشتنت بەرامبەر شاشە.
– شێدارکردنەوەى ناوبەناوى چاو بە قەترەى فرمێسکى دەستکرد.
