لە هەولێر هەریەکە لە گەڕەکەکانی زانیاری، تەعجیل، عەرەبان و منارە بەشدارییان لە پڕۆژەی کارەبای 24 کاتژمێریداکرد و کۆی گشتیی گەڕەکە بەشداربووەکان گەیشتنە 21 گەڕەک.
ئەمڕۆ شەممە، وەزارەتی کارەبای حکومەتی هەرێمی کوردستان رایگەیاند، پڕۆژەی کارەبای 24 کاتژمێری “رووناکی” گەیشتە چوار گەڕەکی دیکەی شاری هەولێر، کە بریتین لە گەڕەکەکانی (زانیاری، تەعجیل، عەرەبان و منارە).
ئاماژەی بەوەشدا، ئەو چوار گەڕەکە نوێیەی کە پرۆژەکە دەیانگرێتەوە، سەرجەمیان نزیکەی 12 هەزار و 500 هاوبەشیان لەخۆگرتووە.
ئەوەشی خستووەتەڕوو، لەماوەی رابردوودا 17 گەڕەک لەرێگای 65 هەزار هاوبەشەوە سوودمەندبوون لە پڕۆژەی کارەبای 24 کاتژمێری، لەئێستاشدا کۆی گشتی ئەو گەڕەکانەی بەشداری پڕۆژەکەیان کردووە 21 گەڕەک و 77 هەزار و 500 هاوبەشن، ژمارەی دانیشتوانیشیان دەگاتە 265 هەزار هاوڵاتی.
