ڕاهێنەری یانەی ئەتلەتیکۆ مەدریدی ئیسپانی، دیێگۆ سیمیۆنی لەلایەن لیژنەی مێژوو و داتاکانی سەر بە فیدراسیۆنی تۆپی پێی جیهان وەک باشترین ڕاهێنەری دەیەی ڕابردووی تۆپی پێ دیاریکرا.
خەڵاتەکە بۆ سەرکێشەکەی ئەرجەنتین پاڵپشتییەکی گەورەیە، پێش گواردیۆلا و کلۆپ و زێدان و چەندین ڕاهێنەری دیکەی دەخات بەتایبەت لە ئێستادا، کە یانەی ئەتلەتیکۆ مەدرید لە کێبڕکێیەکی بەهێزدایە بۆ چنینەوەی نازناوی لالیگا و چامپیۆنزلیگ.
بەپێی داتاکان، دیێگۆ 502 یاری لەسەر کورسی ڕاهێنەری “ڕۆخی بلانکۆس” دانیشتووە، 302 بردنەوە و 118 یەکسانبوون و 82 دۆڕاندنی تۆمارکردووە، نێوەندی ڕێژەی بردنەوەکانی لەسەدا 60 بووە، لە دەیەی ڕابردوو ئەتلەتیکۆی بەرەو نازناوی 2014ی لالیگا بردووە بۆ یەکەمجار لە دوای 1996وە، جامی ئیسپانیا 2013 و سوپەری ئیسپانیای بەدەستهێناوە و چوارجار یانەکەی گەیاندووەتە فاینەڵی پاڵەوانێتیە ئەوروپیەکان، لە ساڵانی 2012 و 2018 نازناوەکانی جامی ئەوروپا و دوو سوپەری ئەوروپی چنیوەتەوە و لە ساڵانی 2014 و 2016دا فاینەڵی چامپیۆنزلیگی دۆڕاندووە.
ئەتلەتیکۆ لە ڕابردوودا یانەیەک بوو بەهیچ شێوەیەک چاوەڕوانی ڕاهێنەرانی نەدەکرد و دووردەخرانەوە، بەڵام پەیوەندی نێوان یانەکە و سیمیۆنی گەیشتووەتە ئاستێک جیابوونەوە نزیکی مەحاڵە.
ناوێکی گەورەی بە ئەتلەتی بەخشیوە
ئەتلەتی یانەیەکی زەبەلاحی ئەوروپی نەبووە، بەڵام لە دوای پەیوەندیکردنی سیمیۆنی و دەستبەکاربوونی وەک ڕاهێنەر هەموو شتێک گۆڕانکاری بەسەردا هات.
بەهۆی کەسایەتی سیمیۆنی و ڕوحیەتی سەرکەوتنیەوە توانیویەتی قەناعەت بە چەندین یاریزانی گەورە و زەنگۆڵەداربکات لە پێکهاتەکانیدا یاریبکەن، تەنانەت لە ئێستادا نرخی پێکهاتەکەی 870 ملیۆن دۆلارە.
لەسەر ئاستی بۆرسە و بایەخی گشتی یانە، ئەتلەتیکۆ نرخی گەیشتووەتە 953 ملیۆن دۆلار واتا نزیکی ملیارێک دۆلار.
کاریگەری سیمیۆنی وایکردووە لەلایەن ئیدارەی ئەتلەتیەوە بەهێزترین بۆندی پێشکەشبکرێت بە موچەی ساڵانە و داهاتی 49 ملیۆن دۆلار، بەوەش بووەتە گرانبەهاترینی لالیگا و جیهان و گەوهەری دانەبڕاوی واندا میترۆپۆلیتانۆ و کاریزمای بەهێزتر لە خودی یاریزانان.
