جێگری سەرۆك وەزیرانی هەرێمی كوردستان رایدەگەیەنێت، بەكارهێنانی سوپا دژی جووتیارانی كورد هەنگاوێكی مەترسیدارە و داهاتووی پێكەوەژیان دەخاتە مەترسییەوە.
قوباد تاڵەبانی، جێگری سەرۆك وەزیرانی هەرێمی كوردستان رایگەیاند، هێشتا مانگێك بەسەر پەسەندكردنی یاسای هەڵوەشاندنەوەی بڕیارەكانی ئەنجومەنی سەركردایەتیی بەعسی هەڵوەشاوە تێپەڕنەبووە كەچی پێچەوانەی دەستوور و یاسا سوپا بەكاردەهێنرێت لە دژی خاوەنە رەسەنەكانی زەوی و زاری سەرگەڕان.
دەشڵێت، “ئێمە هەمیشە كارمان كردووە و هاندەربووین بۆ بەهێزكردنی گیانی پێكەوەژیان لە كەركوك، بەكارهێنانی سوپا و رەفتاری لەم شێوەیە هەنگاوێكی مەترسیدارە و بەردەوامیی پێشێلكاری لەم چەشنە داهاتووی پێكەوەژیان دەخاتە مەترسییەوە”.
باسی لەوەش كردووە، بە تەواویی پشتگیریی جووتیاران دەكەین و بە هاوكاریی هەموو لایەنەكان لە كەركوك هەوڵی چارەسەركردنی یەكجاریی ئەم كێشەیە دەدەین و پێداگریی دەكەین لەسەر سزادانی یاسایی سەرپێچیكاران و ئەوانەشی فەرمانیان داوە بە بەكارهێنانی سوپا لە دژی جووتیارانی كورد.
