هەسەدە ئەنجامى ژمارەیەک چالاکیی شەڕڤانان لە دەوروبەرى قەرەقۆزاق بڵاودەکاتەوە.
هێزەکانى سوریاى دیموکرات (هەسەدە) رایگەیاند، وەک وەڵامێک بۆ هێرشەکانى تورکیاى داگیرکار و گروپە بەکرێگیراوەکان، ئێوارەى دوێنێ هێزەکانیان زنجیرەیەک هێرشیان بۆسەر بنکەى ئەو هێزانە لە دەوروبەرى پردى قەرەقۆزاق ئەنجامدا.
ئەوەشى خستەڕوو، لەو هێرشانەدا سێ سەربازى تورکیا کوژران و دووانى دیکەش برینداربوون.
یەکەکانى شەهید هارون خاڵێکى سەر بە بەکرێگیراوانیان لە گردى قەرەقۆزاق کردە ئامانج و بەتەواوى خاپوریانکرد، وەک ئەوەى هەسەدە ئاماژەى پێداوە.
ئەوەشى خستەڕوو، لە بەرەى بەنداوى تشرین، شەڕڤانان فڕۆکەیەکى درۆنى خۆکوژیان لە دەوروبەرى بەنداوەکە خستەخوارەوە.
هەسەدە روونیشیکردەوە، لە بەرامبەردا لەلایەن فڕۆکەوانیى سەربازیى تورکیاوە دەوروبەرى بەنداوەکە، گوندەکانى تینە و غەسق لە باشوورى کۆبانێ و شارۆچکەى شێخلەر لە رۆژئاواى کۆبانێ بۆردومانکران.
