بۆ پاراستن و رێگریکردن لە فەوتانیان شارەوانیى سلێمانى نووسراوەکانى تایبەت بە مۆڵەت و بڕیارەکانى ئەنجومەنى شارەوانى بە ئەلیکترۆنى دەکات.
سەرۆکایەتیى شارەوانیى سلێمانى رایگەیاند، لیژنەیەکی تایبەتی پێکهێنراوە بۆ کۆکردنەوە و رێکخستنی داتای هەموو مۆڵەتە نیشتەجێ و بازرگانییەکان لە ماوەی ساڵانی 1988 تا 2024، هەروەها بڕیارەکانی ئەنجومەنی شارەوانی لە ساڵی 2000وە.
دەشڵێت، “ئامانجی سەرەکیی ئەم پڕۆژەیە پاراستنی مامەڵەکانی هاوڵاتییانە، لەڕێگەی دروستکردنی داتابەیسێکی ئەرشیفی رەسمى کە هەموو مۆڵەت و بڕیارەکانی تێیدا تۆماردەکرێن”.
ئەم داتابەیسە وەک سەرچاوەیەکی یاسایی و پشتڕاستکراو کاردەکات، بۆیە هاوڵاتییان لەکاتی ونبوون یاخود لەناوچوونی بەڵگەنامەکان دەتوانن بە ئاسانی و بە هۆکاری یاساییەوە مامەڵەکانیان لە فەرمانگەکە وەربگرنەوە، وەک ئەوەى شارەوانیی سلێمانى ئاماژەى پێداوە.
دووپاتیشیدەکاتەوە، هەروەها ئەم کارە بۆ دڵنیابوون لە جێبەجێکردنی یاساکان و پاراستنی مافەکانی هاوڵاتییانە، بە تایبەتی لە بواری مۆڵەت و بازرگانی، سەرۆکایەتیی شارەوانیی سلێمانی بەم هەنگاوە بەرەو سیستمێکی روون و کارای بەڵگەنامەکانی پیشەدارییەوە دەڕوات.
