کێڵگەی کۆرمۆر بایەخێکی یەکجار گەورەی بۆ کەرتی وزەی هەرێمی کوردستان و عێراق هەیە، بە بڕبڕەی پشت و سەرچاوەی سەرەکیی کارەبای هەرێمی کوردستان دادەنرێت.
کێڵگەی کۆرمۆر دەکەوێتە سنووری شارەدێی قادرکەرەم و سەر بە قەزای چەمچەماڵە لە پارێزگای سلێمانی، کێڵگەکە لە ساڵی 2003 بەدواوە لەژێر کۆنتڕۆڵی هەرێمی کوردستاندایە و ئێستا کۆمپانیای دانەغازی ئیماراتی وەبەرهێنانی تێدا دەکات, پێکەوە لەگەڵ کۆمپانیای هیلالی ئیماراتی خاوەنداریی لە %70ی پشکەکانی کێڵگەکە دەکەن.
هەروەها یەدەگی غازی سروشتی کێڵگەی کۆرمۆر بە نزیکەی 17 تریلیۆن پێ سێجا دەخەمڵێندرێت، غازی کێڵگەکە بە بۆری رەوانەی وێستگەکانی کارەبای چەمچەماڵ دەکرێت و %67ی کارەبای هەرێمی کوردستان دابیندەکات، ئەمەش گرنگییەکی یەکجار گەورەی بەم کێڵگەیە بەخشیوە و کردویەتی بە شادەماری بنەڕەتیی کەرتی کارەبا و وزەی هەرێمی کوردستان.
