کەشناسیی هەرێم رایگەیاند، “یەکێک لە بوومەلەرزەکانی ئەمڕۆ بە دووریی 66کیلۆمەترلە بەنداوی دەربەندیخان تۆمارکراوە”.
بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، ئەمڕۆ بوومەلەرزەیەک نزیک سنوورى نێوان عێراق-ئێران بەدووریى 14کیلۆمەتر لە قەزای کەلار و لە دووریی 22کم لە قەزای خانەقین و هەروەها بە دووریی 66کیلۆمەتر لە بەنداوی دەربەندیخان تۆمارکرا.
وتیشی، بوومەلەرزەکە لەڕێگەی تۆڕى بوومەلەرزەزانیى هەرێمى کوردستانەوە تۆمارکراوە. ئەمڕۆ دەستەی کەشناسی و بومەلەرزەزانیی عێراق رایگەیاند، لەبەرەبەیانی ئەمڕۆوە تاوەکو کاتژمێر 2ی پاشنیوەڕۆ پێنج بوومەلەرزە بە گوڕی جیاواز لە سنووری خانەقین، کەلار و کفری تۆمارکراون.
بەپێی راگەیەندراوی کەشناسیی عێراق، بەهێزترین بوومەلەرزەیان گوڕەکەی 4.8 پلە بە پێوەری رێختەر بووە و لاوازترینیشیان گوڕەکەی 2.8 پلە بووە بە پێوەری رێختەر.
