بە بڕیاری بەنگین رێکانی وەزیری ئاوەدانکردنەوە و نیشتەجێکردنی عێراق سەرجەم خانووە بێتاپۆ و زیادەڕەوەکانی عێراق تاپۆدەکەرێن جگە لە کەرکوک.
بەپێی ئەو زانیارییانەی دەست تۆڕی میدیایی ئێستا کەوتوون، لە کۆبوونەوەی رۆژی 12 ی ئەم مانگەی ئەنجومەنی وەزیرانی عێراق بەنگین رێکانی وەزیری ئاوەدانکردنەوە و نیشتەجێکردنی عێراق لە پشکی پارتی دیموکراتی کوردستان بڕیارێکی وەزارەتەکەیانی خوێندووەتەوە کە تێیدا هاتووە، سەرجەم خانووە زیادەڕەو و بێتاپۆکان لە سنووری پارێزگاکانی عێراق لەسەر ناوی خاوەنەکانیان تاپۆدەکرێن، جگە لە خانووە بێتاپۆ و زیادەڕەوەکانی پارێزگای کەرکوک.
هەر بەپێی زانیارییەکان، لەدوای خوێندنەوەی بڕیارەکە خالید شوانی وەزیری دادی عێراق لە کۆبوونەوەکەدا ناڕەزایەتیی خۆی دەربڕیوە و رایگەیاندووە “بڕیارەكە ستەمێكی گەورە لە خەڵكی كەركوك دەكات و نابێت ئەو جیاكارییە بكرێت”، بەڵام رێکانی توانیویەتی پشتیوانی زۆرینەی وەزیرەكانی غەیری كورد بەدەستبهێنێت.
بڕیارەکەی وەزیری ئاوەدانکردنەوەی عێراق زیان لە هاوڵاتییانی کەرکوک دەدات و هەزاران هاوڵاتیی رەسەنی شارەکە لە مافی تاپۆکردنی خانووەکانیان بێبەشیان دەکات، ئەمەش نیگەرانی هاوڵاتییانی شارەکەی بەدوای خۆیدا هێناوە.
