وتەبێژی یەکێتیی نیشتمانیی کوردستان رایگەیاند، گفتووگۆکانی یەکێتیی و پارتی بۆ پێکهێنانی حکومەت بەردەوامدەبن و گرنگە پۆستەکان بە کەسی شیاو پڕبکرێنەوە.
سەعدی ئەحمەد پیرە، وتەبێژی یەکێتیی نیشتمانیی کوردستان رایگەیاند، کۆبوونەوەکانی یەکێتیی و پارتی بۆ پرسی پێکهێنانی کابینەی نوێی حکومەتی هەرێمی کوردستان بەردەوام دەبن.
وتیشی، “بە پێویستی دەزانین کە پۆستەکانی کابینەی نوێێ حکومەتی هەرێم بە کەسانی شیاو و گونجاو پڕبکرێنەوە، لەپێناو پێشکەشکردنی خزمەتی زیاتر بە هاوڵاتییان”.
ئاماژەی بەوەشدا، بۆ پێکهێنانی کابینەی نوێی حکومەت رەچاوکردنی کات گرنگە، بەڵام گرنگتر ئەوەیە کە حکومەتێک پێکبهێندرێت کە ببێتە هۆی دابینکردنی ئارامی و خۆشگوزەرانی بۆ هاوڵاتییانی هەرێم.
