رێباز حەملان، بریکاری وەزارەتی دارایی عێراق رایگەیاند، بەغداد لە ساڵی رابردوودا بەشی 10 مووچە پارەی ناردووە، کە 10 ترلیۆن و 26 ملیار دینار بووە و هەرێمی کوردستان مانگانە پێویستی بە زیاتر لە ترلیۆنێک دینارە و بۆ هەر 12 مانگەکە 12 ترلیۆن دیناری پێویستە.
بریکاری وەزارەتی دارایی عێراق لە چاوپێکەوتنێکی تەلەفزیۆندا راشیگەیاند، ئەو پارەیەی بەغداد ناردوویەتی بەشی 10 مووچە بووە و حکومەتی هەرێمی کوردستان مووچەیەکی لە داهاتی ناوخۆ داوە، دەشڵێت، “لە راگەیەندراوەکەی وەزارەتی داراییدا دەڵێن هەموو مانگێک لە کاتی خۆیدا مووچە هاتووە، بەڵام ئەوە هەڵەیە و وانەبووە، دوای هەموو شوێنێک مووچەی هەرێمی کوردستانی ناردووە.”
دەشڵێت، “وەزارەتی دارایی عێراق دەڵێت، حکومەتی هەرێم خۆی مووچەی دابەش نەکردووە، بەڵام ئەو مووچە نەنێرێت چۆن دابەش بکرێت کە سەرچاوەی مووچە لە بەغدادەوەیە و باسی تەوتین دەکات، لە کاتێکدا لە هەژماری من 730 هەزار کەس تۆمارکراون و پڕۆسەکە بەردەوامە”.
رێباز حەملان جەختیشدەکاتەوە، دەیانەوێت هەرێمی کوردستان وەک هەرێم مامەڵەی لەگەڵ نەکرێت، ئەوەش جێگەی قبوڵ نییە وەک وەزارەتێک مامەڵە لەگەڵ هەرێمی کوردستان بکرێت.
