سلێمانی لە دابەشكردنی نەوتی سپیشدا وەك پێویست مامەڵەی لەگەڵ ناكرێت، بۆ ئەم وەرزەی زستان، حكومەت و وەزارەتی سامانە سروشتییەكان كەمتر لە نیوەی بڕی نەوتی تەرخانكراوی هەولێریان بۆ سلێمانی دابینكردووە.
فەرمانگەی میدیا و زانیاریی حكومەتی هەرێمی كوردستان ئاماری دابەشكردنی نەوتی سپی بۆ ئەمساڵ لەلایەن حكومەت و وەزارەتی سامانە سروشتییەكانەوە بڵاوكردەوە، تا ئێستا لە تەواوی هەرێمی كوردستان نزیكەی 74 ملیۆن و 887 هەزار لیتر نەوت بەسەر هاوڵاتییاندا دابەشكراوە، كە نزیكەی ئەو بڕە بەتەنها دراوە بە هەولێر.
بەپێی داتا خودی حكومەت، هەولێر بۆ ئەمساڵ تا ئێستا زیاتر لە 35 ملیۆن و 589 هەزار لیتر نەوتی بۆ دابینكراوە، كە دەكاتە نزیكەی نیوەی تەواوی بڕە دابەشكراوەكەی هەموو هەرێمی كوردستان، دهۆكیش دووەم زۆرترین بڕی بۆ دابینكراوە، كە زیاترە لە 19 ملیۆن و 738 هەزار لیتر.
بەپێی داتا بڵاوكراوەكان، سلێمانی تەنها 17 ملیۆن و 159 هەزار لیتر نەوتی سپی بۆ دابینكراوە بۆ دابەشكردنی بەسەر هاوڵاتییاندا، كە كەمترە لە نیوەی بڕی تەرخانكراو بۆ هەولێر و لە بڕەكەی دهۆكیش كەمترە.
كەمترین بڕیش بۆ هەڵەبجە دابینكراوە، كە تەنها 2 ملیۆن و 400 هەزار لیتر نەوتی سپییە.
تەنها لە نەوتدا حكومەتی و وەزارەتی سامانە سروشتییەكان جیاوازی لەگەڵ سلێمانیدا ناكەن، بەڵكو لە پرسەكانی غاز و بەنزینیشدا بەشێوازی جیاواز بەرامبەر بە سلێمانی كەمتەرخەمن.
