سەڵاحەدین دەمیرتاش لە نوێترین پەیامیدا پاڵپشتی خۆی بۆ هەوڵەکانی دەم پارتی و عەبدوڵا ئۆجەلان دەربڕی و رایگەیاند “پشتیوانی تەواویانم”.
سەڵاحەدین دەمیرتاش هاوسەرۆکی پێشووی “هەدەپە” دوای کۆتاییهاتنی کۆبوونەوەکەی لەگەڵ شاندێكی دەم پارتی، پەیامێکی ئاراستەی هاوڵاتییان کرد و رایگەیاند، پشتیوانی تەواوەتی لە هەوڵەکانی دەم پارتی و عەبدوڵلا ئۆجەلان دەکەم بۆ ئەنجامدانی پڕۆسەی ئاشتی لە تورکیادا.
دەشڵێت، “عەبدوڵڵا ئۆجەلان رۆڵێكی بەرچاو و گرنگی هەبووە بۆ هەنگاونان بەرەو پڕۆسەی ئاشتی و چەسپاندنی دیموکراسی”.
ئاماژەی بەوەشدا، باشترین چارەسەر بۆ ئێستای گەلەکەمان پشتیوانی سەرتاسەریی و یەکگرتوویمانە، هەربۆیە هەوڵەکانمان بەردەوامدەبێت و لە داهاتوودا شاندەکەمان لەگەڵ چەند لایەن و رێکخراوێکی دیکە کۆبوونەوە دەربارەی چارەسەر ئەنجامدەدات.
