راوێژكاری ئاسایشی نیشتمانیی ئەمریكا دەربارەی هەسەدە رایدەگەیەنێت، ئێمە پشتیوانیی باشترین و نزیکترین هاوبەشی خۆمان دەکەین و دەشڵێت، پێویستە لەگەڵ کورد بین و سەرۆک بایدنیش ئەوەی دەوێت.
جەیک سولیڤان، راوێژکاری ئاسایشی نیشتیمانیی ئەمریکا لە پەیامێكدا رایگەیاند، ئێمە پێویستمان بە توانایەکە بۆ ئەوەی شەڕی داعش لە رۆژهەڵاتی سوریا بکەین و ئەوەش شتێکە کە ئێمە ئامۆژگاریی ئیدارەی داهاتووی (ترەمپ)مان کردووە.
وتیشی، “دووەم پرسی سەرەکی ئەوەیە کە چۆن دڵنیابین لەوەی کە ئێمە پشتیوانیی باشترین و نزیکترین هاوبەشی خۆمان لەو شەڕەی داعشدا دەکەین، واتە هێزەکانی سوریای دیموکرات (هەسەدە)، کە لەلایەن کوردەوە سەرکردایەتییان دەکرێ، بەڵام ژمارەیەکی زۆر لە عەرەبەکانیش لەگەڵیانن”.
پێویستە لەگەڵیان بین و دڵنیابین لەوەی کە ئەوەندە ئاسایشیان هەیە کە بتوانن بەردەوامبن لەوەی ئەو هاوبەشە باشە بن کە بوون و، هەروەها بتوانن بەردەوام بن لە بەڕێوەبردنی زیندانە گەورەکان و کامپەکانی زیندانەکان، وەك ئەوەی جەیک سولیڤان دەیڵێت.
روونیشیكردەوە، هەزاران چەکداری داعش و دەیان هەزار ئەندامی خێزانەكانیان لە ژن و منداڵ لەوێن، کە ئەگەر هەموویان دەربچن، دەبنە هەڕەشەیەکی بەرچاو بۆ سەر ناوچەکە و دواجار بۆ ئەمریکا؛ بۆیە پێویستە لەگەڵ کورد بین و سەرۆک بایدنیش دەیەوێت ئەوە بکات.
