کەشتییەکی گەشتیاریی میسری کە 45 سەرنشینی تێدابوو ئەمڕۆ دووشەممە لە دەریای سووردا نقومبوو.
بەپێی زانیاریی میدیا عەرەبییەکان، لەنێو سەرنشینانی کەشتییەکەدا تەنها 16یان رزگارکراون کە هەندێکیان بە بەکارهێنانی هێلیکۆپتەر دۆزراونەتەوە و گواستراونەتەوە بۆ نەخۆشخانە.
گەڕان بەدوای کەسە ونبووەکاندا بە هەماهەنگی لەگەڵ هێزی دەریایی و هێزە چەکدارەکان هێشتا بەردەوامە.
کەشتییەکە بەیانیی ئەمڕۆ دووشەممە 25ی تشرینی دووەمی 2024 لە مارسا عەلامەوە بەرەو بەندەری پۆرتۆ غالب بەڕێکەوتووە و بڕیار بوو رۆژی 29ی هەمان مانگ بگەڕێتەوە.
زانیارییە سەرەتاییەکان ئاماژە بەوە دەکەن کە کەشتییەکە لە باکووری مەرسا عەلام نوقمبووە.
