حکومەتی هەرێمی کوردستان، رێنماییەکانی جێبەجێکردنی سەپاندنی قەدەغەی هاتوچۆی بۆ سەرژمێریی گشتیی دانیشتووان بڵاوکردەوە و دەڵێت، قەدەغەی هاتوچۆ لە نیوەشەوی 19 و 20ی تشرینی دووەمەوە لە کاتژمێر 12:00ی شەو دەستپێدەکات و تاوەکو کاتژمێر 12:00ی شەوی 21 لەسەر 22ی تشرینی دووەم بەردەوام دەبێت بە هەرێمی کوردستانیشەوە.
لە راگەیەندراوی حکومەتی هەرێمی کوردستاندا هاتووە، بۆ مەبەستی جێبەجێکردنی پرۆسەی سەرژمێریی گشتیی دانیشتووان و ئاڤاهییا بە سەرکەوتوویی و ئاسانکاری لە جوڵە و هاتووچۆی بژمێر و تیمەکانی مەیدانی کە بۆ جێبەجێکردنی پرۆسەی سەرژمێری راسپێردراون، لایەنە یارمەتیدەرەکانی دەزگا ئەمنییەکان لە ماوەی سەپاندنی قەدەغەی هاتوچۆ لە (20-2024/11/21) ئەم رێنماییانەمان دەرکرد:
یەکەم: سەپاندنی قەدەغەی هاتوچۆ لە نیوەشەوی (19-20)ی تشرینی دووەم لە کاتژمێر (12:00)ی شەو دەست پێدەکات و تاوەکو کاتژمێر (12:00)ی شەوی (22/21)ی تشرینی دووەم بەردەوام دەبێت بە هەرێمی کوردستانیشەوە.
دووەم: جوڵەی هاونیشتمانییان و ئۆتۆمبێل لە کاتی جێبەجێکردنی قەدەغەی هاتوچۆ سنووردار دەکرێت (لە نێوان پارێزگاکان، قەزاکان و ناحیەکان و لە نێوان شارنشین و گوندنشین، یاخود لە نێوان ناحیە و قەزا و بە پێچەوانەوە)، جگە لە حاڵەتە مرۆیی و زۆر پێویستەکان و بارودۆخی سروشتی و ئەمنی.
سێیەم: لایەنە ئەمنییەکان و بەڕێوەبەرایەتییەکانی ئامار لە پارێزگاکان و ئیدارەکان سەرجەم (بژمێرەکان، بەڕێوەبەری گەڕەك/گوند و یاریدەدەرەکانیان، سەرپەرشتیاران و چاودێران) بە رەسمی رێگەیان پێدەدەرێت، هەروەها رێگە بە فەرمانبەرانی وەزارەتی پلاندانان دەدرێت بۆ جوڵە و هاتوچۆکردن بۆ مەبەستی کاری سەرژمێری، بە هەمان شێوە، رۆژنامەنووسان و راگەیاندکاران کە لایەنە رەسمییەکان رێگەیان پێ داوە و سەندیکای رۆژنامەنووسان و هەڵگری باجی ناساندنن لە دوو رۆژی قەدەغەی هاتوچۆدا رێگەپێدراون.
چوارەم: هەموو ئەو کەسانەی کە ئەركیان پێ سپێردراوە و لە ئێشگگریدان لە قەدەغەی هاتوچۆ بەدەرن، وەك کارمەندانی تەندروستی و پزیشکی و خزمەتگوزاری کە لە فەرمانگە و دامەزراوە حکومییەکانن و بە پێی مۆڵەتی رەسمیی فەرمانگەکە و پێش رێکەوتی قەدەغەی هاتوچۆ بۆ بەرژەوەندیی گشتی داوای کار و ئامادەبوونیان لێکراوە.
پێنجەم: هاتوچۆی ئۆتۆمبێلی فریاکەوتن، بەرگریی شارستانی، دەوریەی هاتوچۆ و فریاگوزاری و ئۆتۆمبێلەکانی بەڕێوەبەرایەتیی شارەوانی و خزمەتگوزارییەکان لە قەدەغەی هاتوچۆ بەدەرن.
شەشەم: قەدەغەی هاتوچۆ باڵیۆزخانەکان، نێردە دیبلۆماسییەکان، دەزگا نێودەوڵەتییەکان و رێکخراوەکانی نەتەوە یەکگرتووەکان ناگرێتەوە.
